[Enrico Lobina]

Una pariga de diis a oi Cristiano Sabino m’at pediu de cumentai su chi at scritu impitzus de sa manifestada tataresa de su 28 de ladàmini po sa Palestina. Dd’agatais innoi.

S’artìculu donat noas e ponit chistionis de importu,.

Sa primu, sa prus manna po mei chi bivu in Casteddu, est chi in Tàtari funt arrennescius a fai bintrai una parti de pòpulu noa, chi no tenit babbus e mammas nàscius in Sardìnnia, in d-una arrexonada polìtica. 

In Casteddu no seus arrennèscius, in custus annus,a fraigai arrelatas cun is comunidadis de “afrodiscendenti”, e de stràngius in generali, chi funt in s’area metropolitana de meda. E funt medas. Fintzas a is manifestadas po sa Palestina de custas cidas, partecipadas meda, stràngius ndi apu biu pagus.

No fiant manifestadas amesturadas, est a nai “meticce” in italianu.

E, invècias, nosu ndi teneus abbisòngius. Teneus abbisòngiu de una pòpulu ativu e nou.

S’àtera chistioni pertocat su benidori de su mundu e, insaras, su benidori nostu puru. Boleus sighiri a difendi unu mundu “uni-polare” aundi unu Stadu, is Istadus Unius, fait su chi bolit, comenti ddu bolit, e strecat is àterus?
S’Itàlia at perdiu sa gherra, sa de duus, e perou funt passaus 75 annus e prus. Su mundu est cambiau, est cambiendi a lestru, e seus a sa parti sballiada. S’Europa at acabau de si pensai diferenti de is Istadus Unius, e est unu problema po totu su mundu.

Boleus unu mundu « multi-polare », aundi s’Africa e totu is àterus continentis e pòpulus siant lìbberus, o no?

A dolu mannu, sa manca italiana, est a nai is organizatzionis polìtica e socialis chi fiant is organizatzionis stòricas de is trabballadoris, ant scerau de no nai nudda e, duncas, de aturai cun su mundu uni-polari ghiau de Washington.

Impitzus de sa chistioni palestinesa, in s’arretza, girant is bìdius de Bettino Craxi e Giulio Andreotti, e fintzas de Sandro Pertini, chi acrarant poita unu italianu depit gherrai po sa Palestina e cun is palestinesus. Custu no bolit nai a essi diacòrdiu cun totu su chi faint.

Su seti de ladàmini, chi boliàt essi una atzioni de gherra de Hamas e àterus contra Israele, podiat essi fatu de manera diferenti.

Su tzentru de s’artìculu est perou unu àteru. S’atzioni sotziali chi depeus portai ainnanti est, prus o mancu, su chi scrit Cristiano.

Atra cosa est sa polìtica, sa tatica e sa strategia polìtica. In cussas chistionis no seu diacòrdiu cun s’impostatzioni de Cristiano, perou custa est una àtera chistioni.

Po dda serrai, sa spera est chi manifestadas comenti a custas nci ndi siant medas, e chi cresciat sèmpiri de prus in Sardìnnia unu movimentu po su “mondo multipolare”. 

Comenti boleus custu “mondo multipolare” dd’eus a scriri: de seguru no boleus passai de unu meri a unu àteru.